Makenzy Orcel nan kous pou li ranpòte « Prix Goncourt 2022 » a, yon pri literè pou moun ki ekri an franse. Ane sa, otè Ayisyen an pami ywit moun ki nan lis pou ranpòte pri a, apre òganizatè yo fin fè yon dezyèm seleksyon. Gen kat (4) fanm ak kat (4) gason ki ap twoke kòn yo ak zèv yo pibliye an franse. « Une somme humaine » se non woman sa ki ede ayisyen an rive seleksyone jounen madi 4 otòb 2022 a.
Apre dezyèm seleksyon an, gen yon twazyèm seleksyon ki gen pou li fèt. Seleksyon sila ap fèt madi 25 oktòb 2022 a, nan vil Beyrouth nan peyi Liban. Se nan okazyon ouvèti festival liv nan kapital peyi Liban an seleksyon sila ap fèt. Apre sa, akademisyen Goncourt yo ap pwoklame pri a jou k ap jedi 3 novanm 2022 a.
Otè rekèy powèm « Miwo miba » a, Makenzy Orcel, dwe rete konfyan, paske li fè eksplwa deja nan zafè literati nan mond lan. Soti 2010, pou rive 2019, ekriven ayisyen an ranpòte anviwon nèf pri entènasyonal. Youn nan zèv ki pèmèt li ranpòte plis pri, se « l’ombre animale », yon woman ki pibliye nan edisyon Zulma, nan lane 2016.
French
English
Spanish