Nan egzèsis demokratik ki dwe akouche yon prezidan nan tèt pi gwo peyi nan sid amerik la, Luiz Inácio Lula da Silva nan tèt lis la ak 49,2 pousan pandan advèsè ki pi pre li a, Jair Bolsonaro, totalize 43,3 pousan nan moman atik sa ap ekri a. Eleksyon yo òganize pandan jounen dimanch 2 oktòb 2022 a sou tout tèritwa brezilyen an.
Lwa elektoral 30 oktòb la, ki chita sou eleksyon nan peyi Brezil, fè nou konnen, avèk yon sitiyasyon konsa, de (2) kandida yo ap gen pou yo depataje nan yon dezyèm tou, ki dwe fèt apre yon mwa, oubyen kat (4) semèn.
Si Lula te koute sondaj yo, li ta ka fè kè, tansyon l ta ka monte disèt wòtè, paske yo te estime li t ap kraze balans depi nan premye tou sa, li te menm gentan pare kò l pou l al selebre « viktwa » li an gran ponp, atè plat nan avni Paulista, nan vil Sao Polo.
Kounye a, de (2) kandida sa yo pral twouse pye kanson yo pou yo al fè kanpay pandan yon mwa, apre pou nou konnen kiyès ladan yo k ap pote lamayòl. Poutan, soti nan Simone Tebet, rive nan Constituinte Eymael, yo tout deja retire tout espwa pou yo ta vin prezidan peyi Pelé a.
Anpil sitwayen brezilyen plenyen pou kandida ki nan eleksyon sa yo : yo estime kandida yo plis voye toya youn sou lòt olye yo prezante pwojè pou ede peyi Brezil.
Ni Lula, ni Jair toude te pase prezidan peyi Brezil. Lula te prezidan soti 2003 pou rive 2010, epi Jair se aktyèl prezidan an. Yo kritike aktyèl prezidan an pou konpòtman vagnè li te afiche nan epòk kowonaviris t ap fè lapli ak bontan nan mond la.
Yon lòt bò, menm eleksyon sa yo te tou sèvi pou detèmine pwochen palmantè ki pral chita nan chanm yo pou fè lalwa nan peyi foutbòl la.
French
English
Spanish